„საქართველოს სინფონიეტა“ და თბილისის სახელმწიფო კონსერვატორია „თბილისის ბაროკო ფესტივალის“ ფარგლებში 2025 წლის 4 დეკემბერს ატარებს სამეცნიერო კონფერენციას ,,მუსიკა ბაროკომდე და ბაროკოს ეპოქაში”.
თემატიკა:
ორგანიზატორები მიესალმებიან მოხსენებებს ზემოაღნიშნული პერიოდის მსოფლიო, მათ შორის, ქართული მუსიკის შესახებ.
კონფერენციაში მონაწილეობა შეუძლიათ როგორც მუსიკოლოგებს, ისე შემსრულებლებს, როგორც პროფესორებს, ისე სტუდენტებს და დამოუკიდებელ მკვლევრებს. როგორც ინდივიდუალურ, ისე ერთობლივ მოხსენებებს და თემატური სესიების შემოთავაზებას.
მოთხოვნები – აბსტრაქტი არ უნდა აღემატებოდეს 250 ნაბეჭდ სიტყვას, შრიფტი – Sylfaen, შრიფტის ზომა – 12, დაშორება – 1,5.
შევსებული განაცხადი გამოგზავნეთ ელექტრონულ მისამართზე: science@tsc.edu.ge.
გამოგზავნისას SUBJECT ველში აუცილებლად მიუთითეთ: მუსიკა ბაროკომდე და ბაროკოს ეპოქაში.
მიუთითეთ მონაწილეობის ფორმა – ფიზიკური თუ დისტანციური.
შევსებული განაცხადის გამოგზავნის ვადაა 2025 წლის 15 ნოემბერი, 23:59.
შერჩეულ აპლიკანტებს მონაწილეობის შესახებ ეცნობებათ არაუგვიანეს 20 ნოემბრისა.
თემატური სესიის შემოთავაზების შემთხვევაში, სესიის თითოეულმა მომხსენებელმა განაცხადის ფორმაში უნდა მიუთითოს სესიის სათაურიც.
შეკითხვების შემთხვევაში მოგვმართეთ: თსკ კვლევის კოორდინაციის დეპარტამენტი ასოც. პროფესორი მაია სიგუა.
ელ. ფოსტა: science@tsc.edu.ge
——
თბილისის ბაროკო ფესტივალი საქართველოს კულტურის სამინისტროს, ქალაქ თბილისის მერიის, იტალიის საელჩოსა და ფრანგული ინსტიტუტის მხარდაჭერით, 28 ოქტომბრიდან 7 დეკემბრის ჩათვლით, „საქართველოს სინფონიეტა“ რიგით მე-11 „თბილისის ბაროკო ფესტივალს“ გამართავს.
ფესტივალის ფარგლებში 10 კონცერტი ჩატარდება, „საქართველოს სინფონიეტასა“ და სხვა ქართველ მუსიკოსებთან ერთად მონაწილეობენ მსოფლიოში აღიარებული ბაროკოს მუსიკის შემსრულებლები, მათ შორის: ანდრეას შოლი (კონტრტენორი / გერმანია), ჯულია ბოლკატო (სოპრანო / იტალია), კორნელია ფონ კერსენბროკი (დირიჟორი / გერმანია), „ჰელსინკის ბაროკოს ორკესტრი“, ააპო ჰეკინენი (კლავესინი / ფინეთი), ლეილა შაეგი (ვიოლინო / შვეიცარია), ვალენტინ ტურნე (ვიოლა და გამბა / საფრანგეთი), კრისტინე ბუში (ვიოლინო / გერმანია), დოროთე მილდსი (სოპრანო / გერმანია), ფრანჩესკო ჩერა (კლავესინი, ორგანი, დირიჟორი / იტალია), დიეგო კანტალუპი (თეორბო, ბაროკოს გიტარა / იტალია), ფოლკლორული ანსამბლი „შავნაბადა“ და „თბილისის ქალთა გუნდი“.
ფესტივალის საკონცერტო პროგრამა ტრადიციულად ძალიან მრავალფეროვანია და მოიცავს როგორც სოლო ინსტრუმენტული და საორკესტრო, აგრეთვე ვოკალური და საგუნდო მუსიკის რეპერტუარს.
2025 წლის ფესტივალის გეოგრაფიული არეალი გაიზარდა და თბილისის სხვადასხვა საკონცერტო დარბაზსა თუ თეატრს მოიცავს. „თბილისის ბაროკო ფესტივალი“ 28 ოქტომბერს, ჯანსუღ კახიძის სახელობის თბილისის მუსიკალურ-კულტურული ცენტრში გაიხსნება კონცერტით – „ქართული და ევროპული ძველი მუსიკა“, სადაც პირველ განყოფილებაში ფოლკლორული ანსამბლი „შავნაბადა“ ქართული ტრადიციული მუსიკის უძველეს ნიმუშებს წარმოადგენს, ხოლო მეორე განყოფილებაში, მსოფლიოში აღიარებული კონტრტენორი ანდრეას შოლი, ცნობილი იტალიელი სოპრანო ჯულია ბოლკატო, „თბილისის ქალთა გუნდი“ და „საქართველოს სინფონიეტა“, კორნელია ფონ კერსენბროკის დირიჟორობით ჯოვანი ბატისტა პერგოლეზის შედევრს – Stabat Mater-ს შეასრულებენ.
ფესტივალი ნოემბერში გაგრძელდება და რუსთაველის ეროვნული თეატრის მცირე სცენაზე გადაინაცვლებს და კონცერტები გაიმართება: 9, 12, 18, 24, 27, 30 ნოემბერს და 2 დეკემბერს.
ფესტივალი კი 7 დეკემბერს, თბილისის სახელმწიფო კონსერვატორიის დიდ დარბაზში დაიხურება.
კონცერტების დასაწყისი 19:30 ბილეთების შეძენა შესაძლებელია ონლაინ www.tkt.ge